برنامج الصدمة

برنامج الصدمة على اصووووووله ...

.............................

انا مش عارف من وين ابدأ بس الله لايوريكم اللي حصل لي ..

دخلت البوفية اصطبح من صباح الصبح .. ودخل طفل شكله مسكين وبيده فاينات يبيع فاين وجلس بالكرسي اللي جنبي وطلب واحد شاهي وخرج من جيبه قرطاس وسطه روتي .. وجلس ياكلهن .. انا احرقني قلبي وعزمته صبوح لكنه رفض لإن شكله عزيز نفس ..

ودخل واحد شكله شرس يصيح فوق هذا الطفل ومسكه ويشتي ياخذه القسم والطفل بيبكي .. فقمت بساعتي اشوف ايش الخبر والشخص بيقول ان الطفل تدين منه مبلغ عشرة الف ريال عشان يسعف امه ومعد رجعها .. والطفل بيبكي ويقول ( انا افدا لك لاتحبسنيش انا ابيع فاين واسددك) .. انا طلعت بي الحمية الايمانية .. وقلت للرجل حرام عليك يااخي اصبر عليه طالما الفلوس عشان يسعف امه اذن لازم ترحمه وتعطيه مهلة .... ( والرجل رافض تمامآ ويشتي فلوسه بهذيك اللحظة او ياخذ الطفل للقسم ) فقلت بجيبي خمسة الف ريال حق الدبة الغاز سهل اسدد على الولد خمسة الف ... فاعطيتها للشخص ..وقلت له يعطي مهلة للولد عشان يسدده باقي المبلغ .. لكنه رفض وقال يشتي العشرة الف حقه كاملة ..

( وفي واحد بالطاولة اللي قدامي مبتسم وبيأشر لي اجي لعنده) انا رحت لعنده .. وان قدهو مبتسم وبيشاورني ويقول ( هذا برنامج الصدمة نشتي نشوف ردة فعل الناس. اتأخر قليل لاتدخل بينهم لما نشوف اي واحد ثاني يدخل. .. واذا ماحد دخل ادخل انت وواصل)

المهم انا فكرت وقلت مادام هو برنامج الصدمة اذن الجائزة حقه كبيرة وهذا رزق من الصبح .. ودعيت الله ان ماحد يدخل البوفية غيري.. المهم الطفل لازال يبكي وانا قفزت وقلت في نفسي اواصل التمثيلية بقوة وايمان وحمية عربية عالية ..واتدخلت وقلت له ماتاخذ الطفل لو على جثتي .. هذا طفل قاصر .. فقال اشتي فلوسي .. العشرة الألف .( انا فكرت قلت هذو يشتو يختبروا قوة ايماني .. سهل ازيد اتسلف له خمسة الف من صاحب المطعم ..هو صاحبي وعايسلفني. وهو مجرد برنامج وعايعطوني الجائزة ظرف فيه اقل شي خمسين الف) المهم انا نبعت لعند المحاسب وشليت منه خمسة الف ثانية واعطيت الرجل عشرة الف وانا مكاني أمثل واقول له ( والله ماتشل الولد للحبس وهو شاقي بمناديل وفاين ... هذي العشرة الف حقك) المهم اعطيته العشرة الف ..وفجأه اتغيرت ملامحه ونظر لي وابتسم وطبطب على كتفي بابتسامه وقال ( الله يكثر من امثالك) وانا افتهنت بهذيك اللحظة وقلت قد فسخوا لها والان عايعترف لي انه برنامج الصدمة. وزاد سألني سؤال بابتسامة ( ايش اسمك ?? فقلت له يعقوب محرز ..

وسألني سؤال ثالث بابتسامة ( ايش اللي خلاك تسدد الفلوس على هذا الولد وانت ماتعرفه? ) انا ساعتها قلت في نفسي اذن والله انه برنامج الصدمة من صدق ..قانا اجوب على السؤال اجابة نموذجية واكثر الفلسفة عشان يزيدوا الزلط . وقلت له ( يااخي اصلآ الناس للناس .. وهذا واجبنا دينيأ ووطنيآ واخويآ وجغرافيآ وديموغرافيآ ولوجستيآ .....الخ .( ومن هذيك الفلسفة حق يعقوب. ) .. وانه ابتسم وقال لي ( كثر الله من امثالك) وخرج ...

وانا مبتسم قلت قدهو بيخرج لعند مخرج البرنامج ويرجع لي بظرف وسطه مية الف ..

المهم جلست مبتسم على هذيك الابتسامة منتظر ... منتظر .. منتظر ... منتظر .... منتظر ... ولاعازاد رجع .. قلبي نقز وابتسامتي اتحولت الى قعاية معاجهلت حتى ارجع الابتسامة . واحترفت للطاولة الثانية اشوف الطفل أو الشخص اللي قال لي انه برنامج الصدمة .. لكني اكتشفت انهم مش موجودين ..

المهم قلت يمكن نسوني . فخرجت لباب البوفية عشان يشوفوني .. وبدأت اطالع بنوافذ السيارات الواقفات مقابل باب المطعم يمكن مخرج البرنامج وسط واحده منهن .. ( حرام ما تسه) اهااااااااا .. اكتشفت ساعتها انهم زغمة نصابين ( الطفل. والشخص المبهرر .. والشخص اللي قال لي انه برنامج الصدمة .) فسألت صاحب البوفية عليهم فقال لي مايعرفهم ابدآ ...المهم سرقوني وانا مقعي برضاااااااااااااءي. .. فخرجت وانا على الإبتسامة والقعاية اتروحت البيت ودخلت الحارة وانا اسمع اصوات الدباب الغاز يتكعدلين كلآ قد استلم حصته وانا اتروحت عطل .. . انا مش مقهور من طريقة النصب الذكية .. انا اللي قهرني تضرعه الى الله بالدعاء حين قال ( الله يكثر من امثالي. ) ههههه .. ( يارب خارج الخبلان امثالي? ? )

المهم وصلت الى قنااااااااااااعة تااااااااااااااامة بصدق المقولة القائلة ( الله يخارج امة محمد من امة محمد .. أما سعيد اليهودي بعيد)

يعقوب محرز جارالله.